Congress ke senior neta aur Lok Sabha me Leader of Opposition Rahul Gandhi ne ek bar phir 2024 ke Lok Sabha chunav ko lekar Election Commission par zabardast hamla kiya hai. Rahul ka kehna hai ki India ka election system ab mar chuka hai, aur Congress ke paas is baat ka 100% proof bhi hai ki chunav rigged hua tha.
“Yeh data ek atom bomb jaise hoga” – Rahul Gandhi
Ek legal conclave ke inaugural function me bolte huve Rahul Gandhi ne kaha ki jab unki party yeh saboot sabke saamne rakhegi to electoral system me jhatka lagega.
“Yeh literally ek atom bomb jaisa hoga. Jab yeh data release hoga, sab log hil jayenge. Yeh bataayega kaise Lok Sabha elections ko rig kiya gaya,” Rahul ne kaha.
Unka kehna hai ki Prime Minister Narendra Modi sirf kuch seaton ke margin se jeete hai, aur agar 10–15 seat bhi rig na hoti to unka PM banna mushkil tha. Rahul ne yeh sankhya 70-80 se 100 tak hone ka doubt bhi express kiya.
Karnataka se mila data, 1.5 lakh fake votes ka ilzaam
Rahul Gandhi ne Karnataka ke ek assembly constituency ka example diya jahan unki party ne voter list me se physical verification ke zariye 1.5 lakh fake votes identify kiye — total 6.5 lakh voters me se.
“Hamare paas saboot hai ki Lok Sabha chunav rig hua. Aur hum kuch hi dinon me sabit karenge ki bina kisi shak ke, election rigged tha,” Rahul ne kaha.
“2024 nahi, 2014 se hi shak tha” – Rahul Gandhi
Rahul Gandhi ne ye bhi accept kiya ki unke paas pehle saboot nahi the, isliye pehle kuch nahi kaha. Lekin ab saboot mil chuke hain, jinko dekhkar log “kursi se gir jaate hain”, aisa unka daava hai.
Unhone kaha ki:
- 2014 se hi unhe shak tha
- Gujarat aur MP jaise states me Congress ka ek bhi seat na jeetna surprising tha
- Yeh sab natural nahi lag raha tha
Election Commission pe direct attack
Rahul ne Election Commission per bhi seedha aarop lagaya. Unka kehna tha ki:
“Jo sanstha Constitution ko protect karti hai, woh ab poori tarah se khatam ho chuki hai aur ek taraf se kabza kar liya gaya hai.”
Mallikarjun Kharge bhi aaye Rahul ke support me
Congress President Mallikarjun Kharge ne bhi Rahul ke statements ko support kiya aur kaha ki Election Commission ab Modi ji ka puppet ban chuka hai.
Kharge ne Bihar ka udaharan diya jahan SIR ke zariye 65 lakh voters ko disenfranchise kiya jaa raha hai. Unka kehna tha:
“Voting rights gareeb, backward aur minorities ke cheene ja rahe hain. Yeh wahi log hain jo BJP ke rule se tang aa chuke hain.”
Maharashtra ke voter list me bhi irregularities ka daava
Kharge ne Maharashtra ke Assembly aur Lok Sabha elections ka bhi zikr kiya. Unhone kaha:
- Ek choti si room me 9 voters
- Ek hostel me 9,000 voters
“Yeh Election Commission hai ya Modi ji ka puppet?” — Kharge ne sawal uthaya.
Rajnath Singh ne diya jawab: Atom bomb to phodo!
Union Minister Rajnath Singh ne Rahul Gandhi ke aaropon ka jawab diya. Unhone Rahul ko chunauti di ki agar unke paas sach me saboot hai to “atom bomb” turant phod dena chahiye.
“Agar Rahul ji ke paas atom bomb hai, to use turant phoda jaye. Bas apna khayal rakhein,” Rajnath ne Patna me ek media event me kaha.
Singh ne kaha ki Election Commission ek aisi constitutional body hai jiska integrity pe koi sawal nahi uthta. Unhone kaha ki:
“Ye constitutional body poori imaandari se kaam kar rahi hai. Aise statements ek zimmedar neta ko shobha nahi dete.”
Rahul Gandhi ka political narrative aur loktantra ka sawal
Rahul Gandhi ne is poore mudde ko ek bade loktantrik sankat ke roop me dikhaya. Unhone is baat per zor diya ki agar election system hi fail ho jaye, to democracy ka future khatam ho jata hai. Unka daava hai ki:
- Chunav me badlav ki zarurat hai
- Digital verification hona chahiye
- Independent bodies ka role khatam kiya jaa raha hai
