Lollapalooza India 2025 ke liye tayariyan shuru ho chuki hain aur iss baar ka music festival March 2025 mein Mumbai mein hoga. International rock band Green Day aur American singer-songwriter Shawn Mendes ne perform karne ki confirmation de di hai, jisse fans mein kaafi excitement hai.
Organisers ne third edition ke liye worldwide aur Indian artists ka full line-up announce kar diya hai. Festival ka event 8 aur 9 March 2025 ko hoga, aur yeh din live music ke shaukeen logon ke liye yaadgaar ban jayega.
Festival mein Louis Tomlinson, jo pehle One Direction band ke member the, bhi perform karenge. Iske alawa, famous band Glass Animals jinki “Heat Waves” gaana viral hua tha, EDM artist Zedd, aur American DJ John Summit apne beats se stage ko rock karenge. Nothing But Thieves aur Big Boi, jo legendary rap duo Outkast ka part hain, bhi iss event ka hissa banenge.
India ke music scene ko bhi Lollapalooza India 2025 mein kaafi representation milega. Indian artists mein Hanumankind, Raftaar x Kr$na, sitar maestro Niladri Kumar, Lisa Mishra, Raman Negi, Sid Vashi, Raghav Meattle, Sudan, aur Tawliinder perform karenge. Yaani desi aur international music ka ek zabardast mix hoga.
Iss event ko BookMyShow Live lead kar raha hai, jo BookMyShow ka live entertainment division hai. Global producers Perry Farrell aur C3 Presents ke saath milkar yeh event co-produce kiya ja raha hai.
Lollapalooza India 2025
Organisers ka kehna hai ki Lollapalooza India 2025 sirf ek music festival nahi, balki ek aisa platform ban chuka hai jahan alag-alag genres ke artists, jaise pop, rock, hip-hop, EDM, aur techno, apne talent ko showcase karte hain.
Festival ke dauran 20 ghante se zyada ka non-stop music 4 stages pe perform kiya jayega. High-energy beats, stunning art installations, aur funky merchandise attendees ke liye available hoga. Lolla Food Park bhi hoga jo har ek senses ko engage karega. Lollapalooza India har year ki tarah iss baar bhi sabke liye ek badi treat hogi, aur 2025 edition pe sabka focus rahega.
