Uttarakhand ke Haridwar mein sthit Mansa Devi temple mein Sawan ke pavitra mahine ke dauran ek bhayanak bhagdad huvi jisme kam se kam 7 logon ki jaan chali gayi aur 55 se zyada bhakton ko chot lagi. Ye haadsa Mandir ke raste ke seedhiyon per huva jab afwahon ki wajah se bheed mein bhagdaud mach gayi.
Mansa Devi Temple Me bhagdad kaise huvi?
Garhwal Division ke Commissioner Vinay Shankar Pandey ne bataya ki Mansa Devi mandir mein Sawan ke karan hazaaron bhakton ki bheed lagi thi. Jab temple ke raste par afwah udi ki electric current fail gaya hai, tabhi log ghabra gaye aur bhaagne lage. Iss panic ki wajah se log ek doosre par girte chadhte gaye aur stampede ho gaya.
Haridwar ke SSP Pramendra Singh Dobal ke mutabik, “Jab police team site par pahuchi to rescue operation turant shuru kiya gaya. 35 se zyada log hospital admit kiye gaye, jisme 6 logon ki maut confirm hui thi, baad mein ek aur bhakt ne dam toda.”
Ghayal Bhakton Ka Ilaaj Jaari
Mansa Devi ke paas ke medical centres mein ghayalon ka ilaaj jaari hai. Kuch bhakton ko serious injuries aayi hain, jinke haath pair toote hai. Bihar se aayi ek bhakt ne ANI ko bataya ki “bheed itni zyada thi ki log ek doosre ko dhakka dete nikalne lage, main gir gaya aur mera haath fracture ho gaya.”
CM Dhami Aur SDRF Ne Sambhala Mocha
Uttarakhand ke Chief Minister Pushkar Singh Dhami ne kaha ki State Disaster Response Force (SDRF) aur local police site par pahuch chuki hai aur relief operation mein lagi hai. CM ne kaha, “Main local authorities ke touch mein hoon aur situation ko closely monitor kar raha hoon. Prarthana karta hoon ki sab bhakt surakshit rahen.”
Uttarakhand government ne turant relief ke liye financial help announce ki —
- Victims ke parivaar ko ₹2 lakh
- Injured bhakton ke liye ₹50,000
Uttarakhand Police ne help ke liye ye emergency numbers diye hai:
📞 (+91) 94111 12973, 95206 25934
Rashtrapati Aur Pradhanmantri Ne Vyakt Ki Shok-Samvedna
PM Narendra Modi ne is haadse par dukh vyakt karte hue kaha, “Mansa Devi Mandir ke raste bhagdaud mein jo log mare unke parivaaron ke liye samvedna vyakt karta hoon. Injured ka jaldi swasth hone ki kaamna karta hoon. Local administration pura support de raha hai.”
Rashtrapati Droupadi Murmu ne bhi haadse ko “bahut hi dukhdaayi” bataya aur injured ke liye speedy recovery ki prarthana ki.
Sawan Mein Badh Jaati Hai Bheed
Haridwar ke Mansa Devi mandir mein Sawan ke mahine mein darshano ke liye bhakton ka jamawda lagta hai. Ye mahina Shiv bhakton ke liye pavitra mana jata hai, khas kar Kanwariyas jo Ganga se paani lekar Mandiron mein chadhate hai. Aise mein crowd management ka fail hona tragic haadse ka kaaran ban gaya.
Crowd Management Per Sawal
Is haadse ne ek baar phir Mansa Devi jaise bade pilgrimage spots per crowd control aur safety management ko lekar sawal khade kar diye hai. Despite heavy rush har saal, security arrangements aur rumors control par kaafi kaam karne ki zarurat hai.
