External Affairs Minister S Jaishankar ne Rajya Sabha mein Operation Sindoor ke dauraan ek mahatvapurna clarification diya hai. Unhone spast roop se kaha ki 22 April se 16 June ke beech Prime Minister Narendra Modi aur US President Donald Trump ke beech ek bhi phone call nahi hua tha.

Trump ke saath call ke claim per spastikaran dete huve S Jaishankar ne kaha,

“Main unko kehna chahta hoon, woh kaan kholke sun lein – 22 April se 16 June tak, ek bhi phone call President Trump aur Prime Minister Modi ke beech mein nahi huva.”

Ye bayan Congress ke kuch netaon ke us claim ke baad aaya jisme kaha gaya tha ki Operation Sindoor ke dauraan US se phone calls aaye the.

Bharat ki Pakistan ko lekar niti bilkul saaf

S Jaishankar ne Operation Sindoor ke context mein ye bhi bataya ki kai desh Bharat se sampark mein aaye the janne ke liye ki sthiti kitni gambhir hai.

Unhone kaha,
“Sabhi deshon ko ek hi baat kahi gayi – hum kisi madhyasthata ke liye tayyar nahi hain. Pakistan ke saath jo bhi hoga, woh bilateral hoga. Agar unhe yudh rokna hai toh DGMO ke madhyam se request bhejna hoga.”

Is bayan se ye saaf ho gaya ki Bharat ki nayi videsh niti mein kathor spashtata aur rashtrahit pe kendrit drishtikon hai.

Congress aur Indus Water Treaty per prahar

Union Minister S Jaishankar ne Congress per prahar karte hue kaha ki Congress itihas se asuvidha mehsoos karti hai. Unhone kaha ki Congress ne Indus Water Treaty ke mamle mein kai “galtiyan” ki hain.

Unhone kaha,
“Indus Water Treaty ek anokha samjhauta tha jisme Bharat ne apne mukhya nadiyon ka paani doosre desh ko diya, bina kisi hak ke. Yeh duniya ka sabse alag samjhauta hai.”

Jawaharlal Nehru ko bhi liya ghire mein

S Jaishankar ne Jawaharlal Nehru ke 1960 ke Parliament mein diye gaye bayan ka ullekh kiya jisme Nehru ne kaha tha ki Treaty Pakistani Punjab ke hit mein ki ja rahi hai, na ki Bharat ke kisano ke liye.

Unhone kaha,
“Nehru ji ne kaha – ‘Let me do this treaty for the interest of Pakistani Punjab’, aur unhone Kashmir, Punjab, Rajasthan ya Gujarat ke kisano ka koi zikr nahi kiya.”

Yeh pramaanit karta hai ki aaj ke netritva ne pichle kuch faislon par punarvichar kiya hai jo rashtrahit ke viruddh the.

PM Modi ne ki Nehru ki galtiyon ki sudhar

S Jaishankar ne yeh bhi bataya ki PM Modi ne Indus Water Treaty aur Article 370 jaise mamlon mein pichli sarkar ke galat faislon ko sudhara hai.

Unhone kaha,
“Aaj ka netritva rashtrahit mein nirnay le raha hai. Indus Water Treaty ko abeyance mein rakhna aur Article 370 ko hatana aise hi faisle hain jo Bharat ke hit mein hain.”

Pahalgam terror attack aur uske turant baad chalu ki gayi Operation Sindoor par Lok Sabha mein bolte hue PM Modi ne Congress par seedha aarop lagaya. Unhone kaha, “Puri duniya ne Bharat ka saath diya, lekin dukh ki baat hai ki Congress ne nahi.”

PM Modi On Op Sindoor apni speech ke dauraan Congress ke upar bhi bhadke, jahan unhone kaha ki jab Bharat ki sena ne Pakistan ke terrorists ko jawaab diya, tab Congress ne sena ke hosle todne wale bayan diye.

Chidambaram Ke Bayan Par Modi Ka Reaction

PM Modi ka yeh response Congress leader P Chidambaram ke us statement ke baad aaya jahan unhone sarkar se sawal kiya tha ki kya Pahalgam attack ke terrorists Pakistan se the?

PM ne kaha, “Jab desh ke saamne ek sangharsh ho, tab saari political parties ko ekjut hokar desh ka saath dena chahiye. Lekin Congress ne apne political agenda ke liye sena aur sarkar dono par sawal uthaye.”

Rahul Gandhi Per Bhi Sadha Nishana

PM Modi ne Rahul Gandhi per bhi chhoda teer. Unhone kaha, “Kuch log America ke rashtrapati ke bayanon ka hawala dete hain, jaise Bharat apne decisions khud nahi le sakta. Bharat ne apne national interest ke hisaab se kadam uthaya.”

Unhone yeh bhi kaha ki Operation Sindoor ke dauraan 193 deshon me se sirf 3 ne Pakistan ka support kiya, baaki sab Bharat ke saath the.

“56-inch Seena” Waali Tanqeed Per Jawab

PM Modi ne kaha, “Attack ke kuch hi din baad kuch log keh rahe the ‘kahan gayi 56-inch ki chhati?’ Unke statements ne humare jawano ke morale ko giraya. Congress bharose ki kami dikha rahi thi.”

Unhone ye bhi joda ki aaj Bharat ke enemies chain se nahi so sakte, kyunki unhe pata hai ki Bharat unhe chhodne wala nahi.

Shah Ka Bayan: Ballistics Se Confirmation

Home Minister Amit Shah ne bhi Parliament me bayan diya ki encounter me jo rifles mile, unka ballistic match huva hai Pahalgam ke goli se. “Mujhe laga Congress khush hogi ki terrorists maar diye gaye. Lekin yeh log to udaas lag rahe thea,” Shah ne kaha.

Unhone ye bhi kaha ki pehle ke dino me terrorists open planning karte the. Lekin ab unhe har waqt darr lagta hai ki Bharat un per action karega.

Congress MP Priyanka Gandhi Vadra ne Lok Sabha mein Operation Sindoor par charcha ke dauran sarkar par tikhha hamla bolte hue Pahalgam attack mein mare gaye 25 Indians ke naam padhe. Jaise hi unhone pehla naam padha, treasury benches se awaaz aayi “Hindu”, jiska turant jawab Priyanka ne diya “Bharatiya”, jise lekar sadan mein kada face-off dekhne ko mila.

Pahalgam Attack Ka Zikr, Parliament Mein Ghamasaan

22 April ko Jammu Kashmir ke Pahalgam ke Baisaran Valley mein hue atankwadi hamle mein 26 log mare gaye the, jismein 25 Bhartiya aur ek Nepali tourist shamil the. Priyanka Gandhi ne kaha,

“Main un 25 Indians ke naam padhna chahti hoon taaki har MP yaad rakhe ki yeh bhi insaan the, sirf political power ke pawn nahi. Unke parivaar ko sach jaanne ka haq hai.”

Jaise hi unhone pehla naam padna shuru kiya, treasury bench se awaaz aayi “Hindu”, jiska turant jawab Priyanka Gandhi ne diya “Bharatiya”. Iske baad har naam ke saath “Hindu” vs “Bharatiya” ki takraar sadan mein goonjti rahi.

Sarkar Par Suraksha Mein Chook Ka Aarop

Priyanka Gandhi ne Modi sarkar ko target karte hue kaha ki is hinsa ke waqt ek bhi suraksha jawan wahan nahi tha.

“Ek ek karke log mare ja rahe the, aur ek bhi suraksha guard nazar nahi aaya. Log ghanton tak mare ja rahe the. Yeh sarkari chook hai.”

Unhone Shubham Dwivedi ki patni ka zikr kiya jo unke saamne unke pati ki hatya dekh rahi thi.

“Main dekhti rahi, sab kuch khatam hota raha. Ek bhi jawan nahi tha. Yeh desh ke logon ke saath vishwasghaat hai,” Priyanka ne Lok Sabha mein kaha.

Manoj Sinha Ko Lekar Bhi Utha Sawaal

Priyanka Gandhi ne J&K ke LG Manoj Sinha ka bhi naam liya aur unka bayan quote kiya jisme unhone zimmedari sweekar ki thi. Lekin, Priyanka ne sawaal uthaya ki LG ke khilaf koi action kyun nahi liya gaya.

Opposition vs Treasury: Debate Mein Tanav

Operation Sindoor debate ke dauran, jab Priyanka Gandhi ne ek ek karke victims ke naam padhne shuru kiye, tabhi BJP MPs ne religious identity ko highlight karte hue “Hindu” ka naara lagaya. Congress MPs ne iska jawab “Bharatiya” keh kar diya. Yeh mudda jald hi emotional aur political clash mein badal gaya.

Priyanka Gandhi Ka Political Stand

Priyanka Gandhi ka yeh bayan Modi sarkar ke Kashmir policy par bada prashn chinh laga raha hai. Congress is issue ko lekar poore desh mein sarkar ki accountability ko le kar awaaz uthana chahti hai.

Union Minister aur Lok Janshakti Party (Ram Vilas) ke President Chirag Paswan ne Bihar ke girte law and order par Nitish Kumar sarkar ko karara jawab diya. Patna mein media se baat karte hue unhone kaha, “Main dukhi hoon ki main aisi sarkar ka hissa hoon jahan crime apne charam par hai. Agar control nahi kiya gaya to iska anjaam bahut khatarnaak hoga.”

Paswan ne seedha ilzaam lagaya ki sarkar apradhiyon ke aage jhuk gayi hai. “Murder, rape, gang rape, dacoity, theft, eve teasing – yeh sab lagatar ho raha hai. Arrest hone ke baad bhi sawaal hai ki yeh sab ho kyun raha hai?”

Unhone yeh bhi kaha ki chunaav ke nazdeek hone par kuch crimes sarkar ko badnaam karne ke liye bhi ho sakte hain, lekin law and order maintain karna sarkar ki jimmedari hai.

Chirag Paswan ne saaf kaha,

“Ya to administration in crimes mein shamil hai, ya inhein chhupane ki koshish kar raha hai, ya phir puri tarah se fail ho gaya hai. Haalaat khatarnaak hote ja rahe hain.”

Unhone appeal ki, “Bihar sarkar se nivedan hai ki turant action le warna der ho jaayegi.”

Recent High-Profile Crimes in Bihar:

• Gaya mein ek female Home Guard candidate ka ambulance mein gang rape huva.
• Patna ke Paras Hospital mein gangster Chandan Mishra ko goli maar di gayi.
• Industrialist Gopal Khemka ko Patna mein unke ghar ke bahar goli maar kar maara gaya.
• Sand trader Ramakant Yadav ki Dulhin Bazar, Patna mein hatya huvi.
• Grocery trader Vikram Jha ki bhi Patna mein goli maar kar hatya ki gayi.

The Election Commission of India (ECI) ne Wednesday ko official statement me confirm kiya ki Vice President of India ke liye nayi election process start ho chuki hai. Ye step Jagdeep Dhankhar ke sudden resignation ke baad liya gaya, jo ab ek political storm create kar raha hai.

Ministry of Home Affairs (MHA) ne 22 July 2025 ko ek Gazette Notification issue kiya tha jisme Dhankhar ka resignation formally notify kiya gaya. ECI ne kaha ki constitutional vacancy ko fill karne ke liye election schedule jaldi declare kiya jayega.

Election Process Start

ECI ne bataya ki Article 324 ke tahat Vice President election conduct karna unka duty hai. Ye elections Presidential aur Vice-Presidential Elections Act, 1952, aur Rules, 1974 ke under hoti hain. Abhi preparatory steps chal rahe hain, jisme Electoral College ka compilation, Returning Officer aur Assistant Returning Officers ki appointment, aur previous vice-presidential elections ka detailed record ready karna shamil hai.

Dhankhar ke Resignation ke Peeche Kya Hai?

Jagdeep Dhankhar ne Monday ko health reasons ka reference dete hue Vice President ke post se resign kar diya. Officially, unka term 10 August 2027 tak tha, lekin unhone Rashtrapati Bhavan me President Murmu se milkar resignation submit kiya.

Resignation ke turant baad Dhankhar ne X par apna statement share kiya:
“To prioritise health care and abide by medical advice, I hereby resign as Vice President of India, effective immediately, in accordance with Article 67(a) of the Constitution.”

Prime Minister Narendra Modi ne unki service ko appreciate karte hue X par likha, “Jagdeep Dhankhar ne hamare desh ke liye kai important roles me seva di hai. Main unke swasthya ke liye shubhkamna karta hoon.”

Political Speculations

Dhankhar ke resignation ke baad naye Vice President ke naam ko lekar speculation start ho gaya hai. NDA MPs ke mutabiq ruling alliance ek backward community ke nominee par focus kar raha hai. Ram Nath Thakur, jo Minister of State for Agriculture hain aur Bharat Ratna Karpoori Thakur ke bete hain, unka naam frontrunner ke roop me dekha ja raha hai.

Opposition ki Reaction

Congress ne sarkar se explanation maangi hai ki kya unhe Dhankhar ke sudden resignation ki prior information thi. Jairam Ramesh ne kaha ki health reasons ke peeche “far deeper reasons” ho sakte hain. Opposition leaders ne is abrupt decision par apna doubt express kiya hai.

Dhankhar ke resignation ke baad Vice Presidential election ek political hot topic ban gaya hai. ECI ke election schedule ke announcement ke baad ye dekhna interesting hoga ki agla Vice President kaun hoga. Political parties apne cards carefully play kar rahi hain, jabki public aur experts dono speculation me lage huve hai.